طرق عمل البسكويت بمواصفات شهيه
طريقه عمل بسكويت
المقادير:
- كوبين زبدة طرية
- 4 كوب دقيق
- 4 معالق نشا كبار
- كوب ونصف سكر بودرة
- 4 صفار بيض
- رشة ملح
- فانيليا
- كوب كاكاو
طريقه التحضير:
اضربي الزبدة مع السكر البودرة جيدا بالمضرب الكهربائي لحد اما تبقي كريمي ثم قومي بوضع صفار البيض والفانيليا ثم قومي بوضع المكونات الجافة كلها مع بعض الدقيق والنشا والملح وقلبيهم جيدا مع بعض ثم ضعيه على خليط السكر والزبده ثم قومي بعجنيه بالايد لحد ما تلم وشكليه واعملي الخليط كور صغيرة خالص وشكليها على اي شكل يعجبك ممكن وضع كاكاو على نصف العجينه وشكليها نصف فانيليا ونصف شيكولاته
رصيها في صينيه لحد اما تستوي وقدميه وبالهنا والشفا
طريقه عمل بسكويت العجوة
المقادير:
- كيلو دقيق
- نصف كيلو زبده
- نصف كيلو سكر مطحون
- كوب لبن
- 6 بيضات
- فانيليا
- معلقه صغيره بيكينج باودر
طريقه التحضير:
اضربي الزبده والسكر مع بعض ثم ضيفي عليهم البيض تدريجيا ثم الفانيليا اضربيهم جيدا مع بعض ثم انزلي باللبن تدريجيا واضربي لحد اما تبقى كريمي
ثم قومي بوضع الدقيق عليه البيكيج باودر وحطي الدقيق تدريجيا على الخليط واعجنيهم كويس العجينه بتبقى طريه واتركيها فتره
مقادير الحشو
- عجوه
- قرفه
طريقه التحضير:
اعجني العجوه مع القرفه ولو العجوه ناشفه طريها باللبن
هتاخدي حته من العجينه وافرديها بالايد ثم قوم بوضع عجوه على العجينه المفروده واقفلي عليها براحه
هاتي سكينه واعملي خطوط بسطيه جدا على البسكويت
اتركي العجين بعد اما ترصيه في صينيه يريح لمده دقايق دخلي الصينيه في فرن ساخن مسبقاً واتركيها لحد اما يطيب ويحمر الوجه وقدميه وبالهنا والشفا
طريقه عمل الكوكيز
المقادير:
- كوب دقيق
- نصف كوب سكر
- نصف كوب زبده
- 2 معلقه كبيره كاكاو خام
- فانيليا
- رشه ملح
- كوب رقائق شيكولاته (شوكليت شيبس)
- بيضه
- رشه بيكينج بودر
طريقه التحضير:
اضربي السكر في الزبده جيدا ثم قومي باضافه الكاكاو واضربيهم جيدا ضيفي عليهم البيض والفانيليا واضربيهم جيدا لحد اما يبقى الخليط كريمي
قومي بوضع الدقيق مع البيكنج بودر والملح واخلطيهم مع بعض
ثم قومي بوضع الدقيق تدريجياً على الخليط واعجنيهم
اتركي العجينه تريح
ثم قومي بلف العجينه الي كور صغيره ورصيها في صينيه واضغطي ضغطه بسيطه بايديك على العجينه
ضيفي علي الوجه رقائق الشيكولاته واضغطي عليه عشان يلزق
قومي بوضع صينية الكوكيز في فرن ساخن مسبقاً لحد اما تستوي وقدميه وبالهنا والشفا
طريقه عمل البرازق السوري
المقادير:
- كيلو زبده
- كيلو سكر بودره
- 6 بيضات
- فانيليا
- بيكينج بودر
- ربع كيلو لبن ممكن تستبدلي اللبن بماء
- 4 كيلو دقيق
مقادير الحشو:
- سمسم
- عسل اسود
- ضعيهم على بعض
طريقه التحضير:
اضربي السكر مع الزبده جيدا ثم ضيفي البيض والفانيليا وقلبيهم جيدا وضيفي عليهم اللبن وقلبيهم جيدا
اتخلى الدقيق وعليه البيكنج بودر وضعيهم على الخليط تدريجياً واعجنيهم تدريجيا لتتماسك العجينه وتبقى طريه شويه
شكلي العجينه الي كور صغيره وحطيها في طبق السمسم بالعسل واضغطي عليها عشان تتفرد بعد كدا حطيها في صينية وضعيها في الفرن لحد اما تستوي بتطلع من الفرن طريه عادي وقدميها وبالهنا والشفا
طريقه عمل البسكويت التركي
المقادير:
- 2 كوب دقيق
- كوب ونصف زبده
- 4 معالق زيت
- فانيليا
- ربع كوب نشا
- كوب الا ربع سكر بودر
- رشه بيكينج بودر
- معلقة كاكاو خام
طريقه التحضير:
ضعي السكر مع الزيت والزبده واضربيهم جيدا ثم قومي باضافه الفانيليا والنشا واضربي جيدا
قومي بوضع الدقيق عليه البيكنج بودر وضعيه على الخليط تدريجياً واعجنيهم جيدا
قومي بتقسيم العجينه لنصفين وضعي على النصف الاخر كاكاو واعجنيه
قومي بعمل كور بالعجينه وشكليها زي ما تحبي او تضعي 3 كور من العجينه البيضه مع 3 كور من عجينه الكاكاو وضعيهم جمب بعض ليصبح لون ولون واضغطي بايديك عليهم رصيهم في الصينيه واتركيه يريح لدقايق
حطي الصينيه في الفرن لحد اما يستوي وقدميه وبالهنا والشفا